Gjykata e Posaçme Kundër Korrupsionit dhe Krimit të Organizuar ka shpallur fajtor biznesmenin Pëllumb Gjoka në kuadër të dosjes “Metamorfoza”, duke e dënuar për sigurimin e kushteve dhe mjeteve materiale për kryerjen e vrasjeve ndaj Kleanthi Musabellit, Dorjan Dulit dhe Ibrahim Licit, pjesëmarrje në grup të strukturuar kriminal, si dhe korrupsion aktiv të funksionarëve të sistemit të drejtësisë.
Gjykata vendosi ndaj Gjokës dënimin me 9 vite burg. Për shkak të përfitimit nga gjykimi i shkurtuar, dënimi u ul me një të tretën, duke u konvertuar në 6 vite burgim në një institucion të sigurisë së lartë.
Po në të njëjtin proces, GJKKO shpalli fajtor edhe ish-shefin e Policisë, Ardit Hasanbegaj, për veprat penale “Sigurimi i kushteve dhe mjeteve materiale për të kryer vrasje” ndaj Dorjan Dulit dhe Ibrahim Licit, si dhe për pjesëmarrje në grup të strukturuar kriminal.
Hasanbegaj u dënua me 7 vite e 6 muaj burg, ndërsa pas aplikimit të gjykimit të shkurtuar dënimi i tij u reduktua në 5 vite burgim. Gjykata vendosi gjithashtu ndaj tij masën plotësuese të heqjes së të drejtës për të ushtruar funksione publike.
Ndërkohë, Pëllumb Gjoka përballet edhe me një proces tjetër gjyqësor në GJKKO, ku ai akuzohet për përfshirje në vrasjen e Gjin Ndojit.
