Një vilë luksoze në resortin “White Rocks” në Gjilekë të Dhërmiut, e sekuestruar tashmë nga SPAK, është kthyer në një nga episodet më të forta të hetimit ndaj ish-zv.kryeministres Belinda Balluku. Sipas Prokurorisë së Posaçme, pasuria dyshohet se është përfituar si produkt korrupsioni dhe më pas është fshehur përmes veprimeve juridike fiktive, duke përdorur emrat e ish-futbollistit Igli Tare dhe ish-shefes së kabinetit të saj, Joana Bushi.
SPAK ka bërë me dije se Balluku, e cila fillimisht u mor e pandehur për shkelje të barazisë në tendera, tashmë dyshohet edhe për veprat penale të “Korrupsionit pasiv të personave që ushtrojnë funksione publike” dhe “Pastrimit të produkteve të veprës penale apo të veprimtarisë kriminale”, në bashkëpunim.
Sipas hetimeve, episodi lidhet me tenderin për rikonstruksionin e godinës teknologjike të Albcontrol, me vlerë mbi 100 milionë lekë së bashku me shtesën e kontratës. Prokuroria pretendon se kompania fituese “Eurocol” sh.p.k. është favorizuar në procedurë dhe se në këmbim Balluku ka kërkuar dhe përfituar një vilë me vlerë 145 mijë euro në kompleksin turistik në Dhërmi.
Në njoftimin zyrtar, SPAK thekson se nga provat e mbledhura rezulton se përfitimi i parregullt konsiston pikërisht në vilën F6 në resortin “White Rocks”, pasuri e cila tashmë është vendosur nën sekuestro preventive me vendim të Gjykatës së Posaçme.
Hetimet kanë zbuluar, sipas SPAK, se për të fshehur pronësinë reale të vilës janë përdorur kontrata të dyshuara si fiktive. Prokuroria pretendon se më 5 dhjetor 2018 u nënshkrua një kontratë porosie mes Igli Tares dhe pronarit të “Eurocol”, Pandeli Carapuli. Më pas, sipas dosjes, skema vijoi me një kontratë qiraje dhe një amendament të saj, ku përfshihej edhe Joana Bushi.
Sipas hetuesve, vila nuk është përdorur asnjëherë nga Igli Tare. Deklarimet e punonjësve të kompleksit, mirëmbajtësve dhe personave që kanë pasur kontakt me pasurinë, sipas SPAK, tregojnë se në vilë kanë parë të shkojë Belinda Balluku dhe familjarët e saj, ndërsa Tare nuk është parë asnjëherë në pronë.
Një tjetër element që prokurorët konsiderojnë të rëndësishëm lidhet me mobilimin dhe arredimin e vilës. Sipas dosjes, nga komunikimet e sekuestruara në telefonat e personave nën hetim, rezulton se procesi i mobilimit është ndjekur nga vetë Balluku dhe rrethi i saj i afërt, e jo nga Igli Tare, i cili figuronte si porositës i pasurisë.
SPAK pretendon gjithashtu se nuk ka gjetur prova që Joana Bushi të ketë kryer pagesa të dokumentuara për qiranë e vilës, megjithëse në kontratën e paraqitur rezulton si personi që e përdorte pasurinë. Sipas hetuesve, këto veprime përbëjnë elementë të një skeme të dyshuar për fshehjen e pronësisë reale të vilës.
Për këtë arsye, Prokuroria e Posaçme vlerëson se vila F6 në Dhërmi është në pronësi indirekte të Belinda Ballukut dhe përfaqëson një përfitim të ardhur nga korrupsioni. Mbi këtë bazë, më 3 qershor 2026, Gjykata e Posaçme vendosi sekuestrimin e pasurisë, ndërsa hetimet vijojnë për të gjithë personat e përfshirë në këtë episod.
