Hetimet për zhdukjen e 34-vjeçarit Eglant Koçi po marrin përmasa gjithnjë e më të rënda, ndërsa provat e mbledhura deri tani po forcojnë dyshimet se i riu mund të jetë vrarë.
Policia ka sekuestruar automjetin që dyshohet se është përdorur në ngjarje dhe gjatë kontrollit janë konstatuar njolla gjaku, të cilat do t’i nënshtrohen ekspertizës. Nga verifikimet në terren dhe analizimi i kamerave të sigurisë, hetuesit kanë siguruar prova që shtojnë dyshimet se Koçi mund të jetë ekzekutuar nga një person i njohur për të.
Si autor i dyshuar është shpallur në kërkim 41-vjeçari Armand Shakaj, i cili sipas policisë dyshohet se ka marrë peng 34-vjeçarin. Në pranga ka përfunduar edhe 25-vjeçari Enea Zyferi, i dyshuar se ka ndihmuar Shakajn. Zyferi punonte si kamerier në lokalin në pronësi të këtij të fundit.
Hetuesit kanë arritur të gjejnë motorin e Eglant Koçit, si dhe ambientin ku dyshohet se ai është mbajtur. Pamjet e kamerave të sigurisë tregojnë se nga ky vend largohet me automjet Armand Shakaj, ndërsa dyshohet se në makinë mund të ketë qenë edhe trupi i 34-vjeçarit.
Sipas dyshimeve paraprake, për të fshehur gjurmët, Shakaj ka lëvizur motorin e Koçit nga zona ku dyshohet se ndodhi krimi drejt zonës së 5 Majit, ku ai u gjet dy ditë më vonë.
Eglant Koçi u raportua i zhdukur më 4 qershor. Ai u pa për herë të fundit pranë sheshit “Willson” në Tiranë, duke lëvizur me motorin e tij me targë “CT969”. Kamerat e sigurisë kanë dokumentuar edhe disa lëvizje të tij në zona të ndryshme të kryeqytetit para zhdukjes.
34-vjeçari rezultonte i punësuar në një mobileri, ndërsa një nga pistat që po hetohet lidhet me aktivitetin e kriptomonedhave, ku policia dyshon se ai mund të ketë qenë i përfshirë.
Megjithatë, pavarësisht provave të mbledhura deri tani, fati i Eglant Koçit mbetet ende i paqartë. Policia vijon kërkimet intensive për gjetjen e tij dhe kapjen e të dyshuarit kryesor, Armand Shakaj.
