Hetimet për zhdukjen e 34-vjeçarit Eglant Koçi në Tiranë kanë shënuar një zhvillim të rëndësishëm. Me urdhër të Prokurorisë është arrestuar Enea Zyferi, 25 vjeç, i dyshuar për veprën penale “Përkrahja e autorit të krimit”, pasi dyshohet se ka ndihmuar 41-vjeçarin A. Sh., i cili dyshohet se ka rrëmbyer dhe mbajtur peng Koçin.
Familjarët e 34-vjeçarit denoncuan humbjen e kontakteve më 5 qershor 2026, ndërsa sipas të dhënave të bëra publike, prej më shumë se shtatë ditësh ata nuk kanë asnjë informacion për vendndodhjen e tij. Të afërmit kanë deklaruar se Eglant Koçi nuk kishte konflikte apo probleme të njohura.
Sipas burimeve, 34-vjeçari ishte postieri që shkonte te zyrat e këmbimit për të këmbyer kriptomonedhat me cash. Pamjet e fundit të kamerave të sigurisë e shfaqin atë në zonën e Sheshit Wilson në Tiranë, pranë motomjetit të tij dhe afër një automjeti ngjyrë gri, tip “Toyota Corolla”, i cili është përfshirë në verifikimet e grupit hetimor.
Policia bën me dije se, nga veprimet hetimore dhe operacionale të kryera nga specialistët e Sektorit për Hetimin e Krimeve të Rënda ndaj Jetës dhe Pronës, nën drejtimin e Prokurorisë, është bërë i mundur identifikimi i 41-vjeçarit A. Sh., i cili dyshohet se ka mbajtur peng Koçin. Ai është shpallur në kërkim, ndërsa policia po punon për lokalizimin dhe kapjen e tij.
Nga hetimet është gjetur motomjeti i 34-vjeçarit, si dhe është identifikuar dhe kontrolluar ambienti ku ai dyshohet se është futur. Sipas policisë, nga ky ambient më pas ka dalë autori i dyshuar, i cili mund ta ketë marrë me vete Koçin me automjet.
Kontrolle të imtësishme janë ushtruar në ambientin ku dyshohet se mbahej peng 34-vjeçari, si edhe në shumë ambiente të tjera dhe në terren, por deri tani nuk është bërë e mundur gjetja e tij. Nga veprimet hetimore ka rezultuar gjithashtu se autori i dyshuar ka larguar motomjetin e Koçit nga vendi ku ishte parkuar fillimisht.
Automjeti me të cilin dyshohet se është transportuar 34-vjeçari është gjetur dhe sekuestruar në cilësinë e provës materiale.
“Shërbimet e Policisë po vijojnë intensivisht kërkimet për gjetjen e shtetasit E. K. Ndërkohë, po punohet për lokalizimin dhe kapjen e shtetasit të shpallur në kërkim.
Duke qenë se hetimet janë në vijim, për të mos cenuar ecurinë e tyre, bëjmë me dije se në këtë fazë nuk mund të bëhen publike të gjitha rezultatet e hetimit. Në vijim, do të jepet informacion më i plotë sipas ecurisë së hetimeve”, njofton policia.
Hetimet vijojnë për zbardhjen e plotë të zhdukjes së Eglant Koçit, ndërsa 34-vjeçari ende nuk është gjetur.
