Aksidenti tragjik në Spitallë të Durrësit, ku humbën jetën dy të mitur dhe mbeti i plagosur rëndë një tjetër fëmijë, duket se për banorët e zonës ishte një tragjedi e paralajmëruar.
Një banor i lagjes, gjatë homazheve pranë familjeve të viktimave, deklaroi se drejtuesi i mjetit, Nikoll Radaçi, e quante veten “Bisha”. Sipas tij, ai e dëshmoi këtë në mënyrën më të rëndë, duke përplasur tre fëmijë.
Banori ngriti edhe një tjetër akuzë të fortë ndaj institucioneve lokale. Ai tha se komuniteti i kishte kërkuar më herët deputetit të zonës dhe kryetares së Bashkisë së Durrësit, Emiriana Sako, ndërtimin e një këndi lojërash për fëmijët, por kërkesa nuk ishte marrë parasysh.
“Po të kishte një kënd lojërash aty, fëmija nuk lozte këtu, por atje. Ia kërkova edhe deputetit dhe kryetares së Bashkisë, hapni një kënd lojërash. Jo nuk e bëjmë dot më tha, s’e blejmë dot tokën…”, u shpreh banori.
Ngjarja e rëndë ka tronditur Durrësin, ndërsa banorët kërkojnë përgjegjësi jo vetëm për aksidentin, por edhe për mungesën e hapësirave të sigurta ku fëmijët mund të luajnë larg rrugës.
