Prokuroria e Tiranës ka përfunduar hetimet dhe ka dërguar për gjykim gjashtë persona të përfshirë në skandalin e Spitalit Onkologjik në QSUT, mes tyre zëvendësdrejtoresha, koordinatorë, mjekë e specialistë, si dhe një administrator i një kompanie farmaceutike.
Sipas hetimeve, pacientë me sëmundje tumorale nuk merrnin trajtimin e duhur në spitalin publik, por orientoheshin drejt klinikave private, ku kryheshin ndërhyrje dhe shërbime kundrejt tarifave të larta, edhe pse këto shërbime duhet të ofroheshin falas në sistemin shtetëror.
Të pandehurit janë Emiljano Lela, Alketa Pere, Brikena Qirjazi, Drilona Kishta, Halil Gashi dhe Florian Marku, të akuzuar për “Shpërdorim detyre”, “Fshehje të të ardhurave” dhe “Tregtim e transport mallrash kontrabandë”. Çështja ishte referuar fillimisht në SPAK, por më pas u rikthye në Prokurorinë e Tiranës, ndërsa për mjekun onkolog E.G. hetimet vijojnë të veçuara për “Korrupsion pasiv”.
Një nga gjetjet më të rënda lidhet me aparaturën e Kobalto-Terapisë, e ardhur në Shqipëri që në vitin 2021, e cila nuk u vu kurrë në funksion. Sipas Prokurorisë, mungesa e një bunkeri antiradioaktiv sipas standardeve ndërkombëtare bëri që pajisja të vendosej në kushte të papërshtatshme, pranë kabinetit të radiologjisë, duke u kthyer në burim të mundshëm rreziku për personelin.
Hetimet tregojnë se koordinatori Emiljano Lela ndërhynte në listat e pritjes dhe orientonte pacientët drejt klinikave private, duke përfituar përqindje monetare. Edhe administratorja Alketa Pere dërgonte pacientë në privat në kundërshtim me rregullat ligjore.
Për zëvendësdrejtoreshën Brikena Qirjazi, Prokuroria thekson se nuk mori masa për vënien në funksion të aparaturës së kobaltit, duke kufizuar trajtimin e pacientëve vetëm në alternativa të pjesshme. Ndërsa specialistja Drilona Kishta akuzohet për një ekspertizë jo në përputhje me realitetin, që çoi në blerjen e një burimi radioaktiv të papërdorshëm dhe me kosto për shtetin.
Në të njëjtën skemë, Halil Gashi akuzohet se nuk lëshonte fatura për shërbimet në klinikë dhe lejonte punë të paregjistruar, ndërsa Florian Marku, administrator i “Flori Farma”, dyshohet se ka tregtuar barnin “Valamor” në mënyrë kontrabandë, pa pullë të AKBPM-së dhe me barkod të dëmtuar.
Prokuroria thotë se të gjitha këto veprime kanë dëmtuar pacientët dhe interesat e shtetit, duke çuar çështjen për gjykim.
