Kosova shkon drejt zgjedhjeve të reja të jashtëzakonshme, pasi Kuvendi nuk arriti të zgjedhë Presidentin e ri brenda afatit kushtetues. Dy datat që po shihen si të mundshme për mbajtjen e zgjedhjeve janë 31 maji dhe 7 qershori, ndërsa vendimi formal duhet të merret nga ushtruesja e detyrës së Presidentes, Albulena Haxhiu.
Ngërçi politik u thellua pas seancës së thirrur nga Lëvizja Vetëvendosje për zgjedhjen e Presidentit, pa një marrëveshje paraprake me partitë opozitare. LVV propozoi Feride Rushitin dhe Hatixhe Hoxhën, por procesi nuk arriti të prodhonte konsensus.
Seanca u ndërpre dhe rifilloi disa herë, deri pak para mesnatës, kur Kuvendi u shpërnda. Me kalimin e afatit për zgjedhjen e kreut të shtetit, vendi hyn zyrtarisht në proces të ri zgjedhor, për herë të tretë brenda rreth një viti e gjysmë.
Sipas Kushtetutës, zgjedhjet duhet të mbahen brenda 45 ditësh. Duke llogaritur periudhën e fushatës dhe procedurat parazgjedhore, datat më të mundshme mbeten 31 maji dhe 7 qershori, me këtë të fundit që shihet si skenari më i mundshëm.
Gjatë përpjekjeve të fundit për zgjidhje, kreu i LDK-së, Lumir Abdixhiku, i paraqiti Albin Kurtit emrin e Vjosa Osmanit, duke kërkuar garanci se ajo do të merrte 66 votat e mazhorancës. Kurti, nga ana tjetër, ofroi vetëm mundësinë e një gare, ku Osmani të ishte kundër-kandidate e Feride Rushitit.
Ky propozim nuk u pranua nga opozita, pasi pas dy raundeve të para, në raundin e tretë LVV do të mund të zgjidhte kandidaten e saj me votat që kishte. Dështimi për të gjetur marrëveshje e ka çuar Kosovën drejt një tjetër fushate të jashtëzakonshme zgjedhore.
