Apeli i Gjykatës së Posaçme Kundër Korrupsionit dhe Krimit të Organizuar ka rrëzuar kërkesën e kryebashkiakut të Tiranës, Erion Veliaj, për pezullimin e afatit të paraburgimit.
Vendimi është marrë pas shqyrtimit të kërkesës së paraqitur nga mbrojtja e tij, e cila kishte argumentuar se zgjatja e afateve lidhej me rrethana që nuk vareshin drejtpërdrejt nga Veliaj.
Pas seancës, avokati i tij, Plarent Ndrecaj, deklaroi për mediat se vendimi është i pajustifikuar, duke theksuar se klienti i tij po penalizohet për shkak të situatave që lidhen me të pandehur të tjerë në të njëjtin proces.
“Është absurde që klienti im ta pësojë prej një të pandehuri tjetër. Do kërkojmë çdo të drejtë që na takon nga parashikimet kushtetuese dhe nuk do ndalemi”, u shpreh Ndrecaj.
Sipas mbrojtjes, afatet e paraburgimit janë ndikuar nga shtyrjet e procesit gjyqësor, të cilat kanë ardhur si rezultat i kërkesave të avokatëve dhe problematikave të tjera proceduriale gjatë shqyrtimit të çështjes.
Me këtë vendim, Apeli i GJKKO lë në fuqi vijimin e masës së paraburgimit për Veliajn, ndërsa mbrojtja ka paralajmëruar se do të ndjekë të gjitha rrugët ligjore për të kundërshtuar këtë vendimmarrje.
