Procesi gjyqësor për dosjen “Veliaj” në Gjykatën e Posaçme duket se ka marrë një zhvillim të ri, duke dalë nga bllokimi që e ka shoqëruar prej muajsh.
Gjatë seancës së zhvilluar, Gjykata e Posaçme ka vendosur që të ndajë çështjet dhe të vijojë me shqyrtimin për personat e përfshirë në dosje që kanë kërkuar gjykim të shkurtuar.
Ndër personat për të cilët është vendosur të nisë shqyrtimi i veçuar i çështjes është edhe bashkëpunëtori i ngushtë i kryebashkiakut të Tiranës, Erion Veliaj, shtetasi Elman Abule.
Dosja “Veliaj” ka qëndruar e zvarritur për rreth 9 muaj në Gjykatën e Posaçme Kundër Korrupsionit dhe Krimit të Organizuar, për shkak të shtyrjeve të njëpasnjëshme të procesit. Sipas informacionit, këto shtyrje janë shkaktuar nga veprime procedurale dhe skema të përdorura nga vetë Erion Veliaj, i cili akuzohet për 5 vepra të rënda penale.
