Në seancën e zhvilluar sot në Gjykatën e Posaçme Kundër Korrupsionit dhe Krimit të Organizuar, avokati i Ilir Metës, Kujtim Cakrani, ka kërkuar sërish që klienti i tij të mos qëndrojë në ambientin e mbyllur me xham gjatë procesit gjyqësor, duke e cilësuar këtë praktikë si poshtëruese dhe në kundërshtim me dinjitetin e të pandehurit.
Gjatë fjalës së tij në sallë, Cakrani u shpreh se ky trajtim nuk garanton barazi në proces dhe vështirëson komunikimin mes tij dhe klientit.
“Vetëm ISIS i poshtëronte kështu njerëzit. Është për turpin e të gjithëve, për turpin e drejtësisë së re ky lloj trajtimi”, deklaroi ai.
Avokati theksoi se kërkesa e paraqitur është e bazuar në argumente ligjore dhe kërkoi nga trupa gjykuese që vendimmarrja të mbështetet mbi ligjin.
“Nuk bisedoj dot me presidentin për sa kohë ndahemi me xham. Ne nuk jemi të barabartë kështu”, shtoi Cakrani.
Në argumentimin e tij, ai solli edhe shembuj nga raste të mëparshme gjyqësore në Shqipëri, duke përmendur figura të periudhës komuniste që, sipas tij, nuk janë trajtuar në këtë mënyrë, pavarësisht akuzave ndaj tyre.
Seanca në GJKKO vijon, ndërsa pritet që gjykata të shqyrtojë kërkesat e palëve dhe të vendosë mbi çështjet e ngritura gjatë procesit.
