Operacioni i Prokurorisë së Posaçme kundër krimit të organizuar ka zbuluar detaje të reja nga aksioni i zhvilluar sot ndaj Call Center-ave në Tiranë, ku janë shpallur në kërkim pronarët e një prej subjekteve dhe janë kryer kontrolle edhe në banesën e një efektivi policie të shoqëruar me urdhër të SPAK.
Sipas burimeve nga aksioni, Call Center-i i goditur ndodhej pranë rrugës “Sami Frashëri”, ndërsa hetimet kanë çuar në dyshime për përfshirje të personave me detyra shtetërore në këtë aktivitet. Për këtë arsye, kontrolli është shtrirë edhe në banesën e efektivit të policisë, i cili është shoqëruar për verifikime të mëtejshme.
Gjatë operacionit të zhvilluar në bashkëpunim me agjentët e Byrosë Kombëtare të Hetimit, janë sekuestruar dokumente të ndryshme, pajisje elektronike dhe shuma parash cash, të cilat dyshohet se lidhen me aktivitetin e Call Center-it.
Aksioni ka nisur fillimisht në ambientet ku ushtronin aktivitet këto struktura dhe më pas është zgjeruar edhe në disa banesa, në kuadër të hetimeve që po zhvillohen për një skemë të dyshuar mashtrimi.
Burimet bëjnë me dije se ndërhyrja është ndërmarrë pasi SPAK dyshon për përfshirjen e punonjësve të policisë në këtë veprimtari, ndërsa hetimet vijojnë për identifikimin e personave të tjerë të implikuar dhe zbardhjen e plotë të rrjetit.
