Zbardhen detaje të reja nga dosja hetimore për operacionin ndaj disa call center-ave në Tiranë, të akuzuar për mashtrimin e mijëra qytetarëve europianë, kryesisht në Austri, me një dëm që dyshohet se kalon 30 milionë euro. Pesë prej të arrestuarve pritet të dalin sot para gjykatës për t’u njohur me masën e sigurisë.
Sipas materialeve hetimore të siguruara nga Euronews Albania, sinjalizimi për këtë skemë mashtrimi është bërë që në vitin 2024 nga autoritetet austriake. Hetimet kanë zbuluar se përmes platformave online ALPHASCRYPTO, CAPITALMARKET24 dhe GOLDCAPITAL24 janë zhvilluar mashtrime të organizuara në Vjenë dhe qytete të tjera, gjatë periudhës 15 qershor 2023 deri më 30 korrik 2024.
Në dosje përshkruhet mënyra se si funksiononte skema. Autorët, përmes paraqitjes së rrethanave të rreme, bindnin qytetarët të transferonin para me premtimin se do të investoheshin në tregje financiare. Në realitet, investimet nuk kryheshin kurrë, ndërsa fondet kalonin në një rrjet të ndërlikuar për pastrimin e parave. Si pasojë e informacionit të rremë, viktimat kanë dërguar shuma të konsiderueshme që në total dyshohet se tejkalojnë 30 milionë euro.
Sipas hetimeve, viktimat tërhiqeshin fillimisht përmes reklamave të rreme ku përdoreshin edhe personazhe të njohur për të rritur besueshmërinë e platformave. Më pas, personat që prezantoheshin si “këshilltarë financiarë” merrnin kontakt dhe përdornin programin AnyDesk për të marrë kontroll nga distanca mbi kompjuterët e tyre, duke lehtësuar transferimin e parave.
Autorët kanë tentuar të fshehin gjurmët duke përdorur VPN dhe Proxy për maskimin e adresave IP, megjithatë autoritetet partnere kanë arritur të identifikojnë disa IP shqiptare, të cilat janë vënë në dispozicion të hetimit.
Nga informacionet e përcjella nga autoritetet austriake përmes Oficerit të kontaktit, rezulton se rrjeti kishte lidhje me dy shtetas që dyshohet të kenë qenë përfituesit fundorë të skemës. Bëhet fjalë për Mateo Hoxhën, i cili dyshohet se ka përfituar 3.217.957,71 dollarë, dhe Tedi Agastrën, i cili dyshohet se ka përfituar 4.811.154,08 dollarë.
Gjithashtu, hetimet tregojnë se rreth 8 milionë dollarë janë konvertuar në kriptovaluta, duke vështirësuar më tej gjurmimin e parave dhe identifikimin e plotë të rrjetit.
