Samiti i Diasporës në Tiranë është shoqëruar me kritika të forta nga pjesëmarrësit, duke nxjerrë në pah pakënaqësi për mënyrën si trajtohet diaspora shqiptare. Një nga zërat më të drejtpërdrejtë ishte ai i juristes Eva Baçi, e cila jeton dhe punon në Prokurorinë e Bolonjës në Itali.
Gjatë një paneli ku ishin të pranishëm Niko Peleshi dhe Taulant Balla, Baçi kritikoi mënyrën se si organizohen këto samite, duke theksuar se ato mbeten më shumë në nivel deklarativ dhe nuk u japin hapësirë reale përfaqësuesve të diasporës.
“Dëshira për t’u kthyer në Shqipëri është shumë e madhe, ndaj marrim pjesë në Samite sepse presim një dritare të hapur nga toka mëmë, për t’u kthyer, që të na hapë derën. Skenari është shkruar shumë bukur, si ai regjisori që shkruan shumë bukur, dëgjojmë narativa, por mungojnë aktorët kryesorë që është Diaspora. Ky është Samiti i Diasporës. Mendoj se përveç hapjes që fjala duhet t’u jepet ministrit, kryeministrit dhe presidentit, aktorët kryesorë jemi ne. Unë doja që të bëja një diskutim dhe nuk m’u dha e drejta e fjalës. Duhet t’i mbarojmë këto filmat e bukur, që ne vetëm të dëgjojmë”, tha ajo.
Baçi nënvizoi se shumë profesionistë shqiptarë jashtë vendit, pavarësisht përgatitjes së lartë, ndihen të papërfaqësuar dhe të papërkrahur nga institucionet shqiptare. Sipas saj, diaspora shpesh trajtohet vetëm si statistikë dhe jo si potencial real për zhvillimin e vendit.
“Unë kam mbaruar 3 fakultete në Bolonjë, kam dy specializime. Kemi kërkuar shumë herë, që të hyjmë të japim kontributin tonë. Unë punoj 14 orë në Itali, por mund të punoj 20 orë për Shqipërinë. Unë nuk kam vend ku të flas, dua të shpreh atë që kam, sepse përndryshe ne ngelemi vetëm numra. Unë nuk mund të pres biletën të vij që andej për të qenë një numër. Unë kam ngelur shumë keq dje, kur u dhanë çmimet. Në krahun tim është njëri nga sipërmarrësit shqiptarë që i jep punë 350 familje dhe ju nuk i dhatë një çmim, Astrit Poti.
Ju jeni larg realitetit, flas për politikanët, jeni larg realitetit, nuk jeni afër me ne. Jemi pa përkrahje dhe kur nuk të përkrah shteti yt, kur ti nuk jep kontribut në shtetin tënd. Unë për Italinë jam më e përgatitura, por jam thjesht e huaj. Ne duam të kthehemi në vendin tonë.
Këto panelet e ndara nuk janë mirë. Ne aktorët kryesorë duhet të flasim, të sjellim problemet. Jo të dëgjojmë politikanët, narativa është shumë e bukur, por ju nuk e keni idenë çfarë do të thotë sakrifica, pa asnjë përkrahje dhe asnjë ndihmë.
Hapni dyer, sepse Shqipërisë nuk i mungon truri. I keni mbyllur dyert, të gjitha personave që janë të përgatitur”, u shpreh ajo.
Në përfundim, juristja adresoi një mesazh të drejtpërdrejtë ndaj politikës, duke përmendur edhe Taulant Balla dhe duke theksuar shkëputjen e drejtuesve nga realiteti i diasporës:
“Kam edhe shumë gjëra, por po të më jepet mundësia unë diskutimin e kisha përgatitur. Zoti Taulant Balla, je i pari që je shumë larg realitetit. Votën mund ta kalosh edhe 4 vite të tjera, por në histori duhet të lësh një emër, sepse jeni të gjithë vetëm kalimtarë në këtë vend duhet të lëmë një emër, jo vetëm të vidhni dhe të siguroni njerëzit tuaj”.
