Gazetari Artan Hoxha është paraqitur sot në SPAK, ku ka dorëzuar kasetën origjinale me audioregjistrimin që sipas tij provon se vrasjet e ndodhura më 21 janar 2011 janë kryer me urdhër nga lart.
Në një prononcim për mediat jashtë ambienteve të SPAK, Hoxha sqaroi se materiali i dorëzuar është një kasetë diktofoni, ku dëgjohen qartë urdhra të dhëna nga komandanti i Gardës, para, gjatë dhe pas momentit kur ndodhën vrasjet.
“Ka qenë një deklarim i gjatë në lidhje me procedimin që ka hapur SPAK. Unë pata paraqitur një kasetë dhe dhashë edhe deklarimet për ngjarjet konkrete. Në vijim të atij deklarimi jam paraqitur sot dhe kam dorëzuar kasetën origjinale. Është një kasetë diktofoni. Edhe kaseta e parë nuk është ekspertuar akoma.
Materiali që është dorëzuar sot është kaseta origjinale e regjistruar në audio ku dëgjohen qartësisht urdhrat që janë dhënë nga komandanti i Gardës, para, gjatë dhe pas momentit kur ndodhën vrasjet më 21 janar.
Tashmë kemi një indicie që të çon drejt provës. Ky audio regjistrim dëshmon qartë që vrasjet nuk janë bërë nga pakujdesia, por janë bërë me urdhër dhe ka pasur hierarki që komandonte të gjithë forcat e Gardës”, deklaroi Hoxha.
I pyetur për burimin e këtij materiali, gazetari theksoi se ai duhet të mbrohet, pasi sipas tij ka kryer një shërbim të madh për vendin dhe ka ndikuar drejtpërdrejt në ndryshimin e drejtimit të hetimit, i cili më herët i kishte cilësuar vrasjet si të kryera nga pakujdesia.
“Për mua merr shumë rëndësi mbrojtja e këtij burimi. Është një burim që i ka bërë një shërbim të madh vendit, rëndësia e tij është e madhe sepse denoncon një krim shtetëror”, u shpreh Artan Hoxha.
