Drama e tre fëmijëve të mitur të gjetur në gjendje të rëndë mbrëmjen e së dielës në Durrës është shndërruar në kryefjalë të lajmeve, ndërsa palët e përfshira kanë shkëmbyer akuza dhe kundërakuza në kurriz të tre fëmijëve. Pamjet e publikuara në rrjetet sociale tregonin fëmijë të paushqyer dhe të lënë prej ditësh në mëshirë të fatit, të konstatuar nga Policia e Shtetit.
Ngjarja u denoncua publikisht nga ish-vjehrra e nënës së fëmijëve, me të cilën kjo e fundit pati një përballje live, duke kundërshtuar akuzat dhe duke pretenduar se situata ishte inskenuar.
Sot ka folur për herë të parë babai i tre fëmijëve. Në një bisedë të gjatë me drejtuesen e emisionit, ai ka rrëfyer detaje nga jeta bashkëshortore, duke deklaruar se divorci ka ardhur si pasojë e tradhtisë nga ana e ish-bashkëshortes.
Sipas tij, ajo ka kryer veprime të turpshme me meshkuj të tjerë, edhe në prani të fëmijëve, dhe se ai disponon pamje filmike për këtë.
“Mund të pi një shishe birrë apo të vë ndonjë skedinë, por as nuk jam i alkolizuar e as nuk luaj kumar apo të shes shtëpinë. Unë atë e kam kapur me dy persona. Si mund të lërë një baba, nënën e tre fëmijëve të tij.
E kanë parë edhe fëmijët kur ka kryer marrëdhënie, të flasin edhe fëmijët, kam edhe video. Ajo thoshte ka urdhër mbrojtje. Denoncimi është bërë sepse ish i dashuri i saj i ka gjuajtur tim biri dhe unë e kam kërkuar ta rrihja. Ajo më denoncoi në polici. Po kërkoja ish të dashurin, e kërkoj akoma dhe nëse e gjej e di un se çfarë do t’i bëj. E kam me video, më ka rrahur djalin e vogël”, tha ai.
Autoritetet vijojnë verifikimet për zbardhjen e plotë të rrethanave të rastit, ndërsa fëmijët ndodhen nën kujdesin e institucioneve përkatëse.
