Në Gjykatën e Tretë të Krimeve të Rënda në Romë ka nisur procesi gjyqësor ndaj Mark Samson, i akuzuar për vrasjen brutale të ish-të dashurës së tij, studentes shqiptare Ilaria Sula. Ngjarja e rëndë ndodhi në mars të këtij viti, në apartamentin e Samson, ku ai vrau 23-vjeçaren dhe më pas futi trupin e saj në një valixhe që e hodhi në një zonë pyjore në periferi të kryeqytetit italian.
Prokuroria e Romës, nën drejtimin e zëvendësprokurorit Giuseppe Cascini, ka ngritur ndaj tij akuzat për vrasje me dashje e paramendim, me motiv të kotë, për marrëdhënie emocionale me viktimën dhe fshehje të kufomës. Në bazë të provave të mbledhura gjatë hetimeve, gjykata ka pranuar kërkesën për gjykim të menjëhershëm, duke shmangur kështu fazat paraprake të procesit.
Në sallën e gjyqit ishin të pranishëm vetë i pandehuri, familjarë dhe miq të Ilaria Sulës, të cilët mbanin në duar fotografinë e saj dhe pankarta me mbishkrimin “Drejtësi për Ilarinë”.
Sipas agjencisë italiane LaPresse, avokati i familjes së viktimës, Giuseppe Sforza, ka deklaruar se pozicioni i nënës së Mark Samson është drejt finalizimit, pasi ajo po negocion me drejtësinë një marrëveshje për ulje dënimi. Në këmbim të pranimit të fajësisë, asaj i është propozuar një dënim prej dy vitesh burg, pasi akuzohet për bashkëpunim në fshehjen e trupit të vajzës dhe pastrimin e gjakut në vendin ku dyshohet se djali i saj kreu krimin.
“Familja e Ilarias po e përjeton këtë moment me shumë tension dhe trishtim,” është shprehur avokati Sforza. “Ata kërkojnë drejtësi, por janë të vetëdijshëm se asnjë vendim gjykate nuk mund të zbusë dhimbjen që do t’i shoqërojë gjithmonë.”
