Një aksident i rëndë ka ndodhur të premten në qytetin e Kërçovës, Maqedonia e Veriut, ku dy vajza të reja shqiptare kanë humbur jetën.
Viktimat janë Eriona Ramadani dhe Albina Abazi, të dyja 16-vjeçare, nxënëse të Shkollës së Mesme të Muzikës “Drita”. Ato po udhëtonin me motoçikletë pranë fshatit Kolibar, kur ndodhi tragjedia fatale.
Lajmi i hidhur ka tronditur thellë komunitetin e shkollës dhe banorët e zonës. Në një reagim publik, drejtoria e SHMK “Drita” shprehu dhimbjen dhe ngushëllimet për familjet e vajzave:
“Me dhembje të thellë dhe zemra të tronditura morëm lajmin për ndarjen tragjike nga jeta të dy nxënëseve tona të dashura, Eriona Ramadani dhe Albina Abazi. Humbja e tyre ka prekur thellë çdo kënd në shkollën tonë dhe ka lënë pas një boshllëk të pazëvendësueshëm. Në këto çaste të rënda, stafi pedagogjik, drejtoria dhe gjithë nxënësit e SHMK ‘Drita’ shprehim ngushëllimet më të sinqerta për familjet, të afërmit dhe miqtë e tyre. Qoftë kujtimi i Erionës dhe Albinës i përjetshëm! U prehshin në paqe!”
Ngjarja ka shkaktuar pikëllim të madh në Kërçovë, ndërsa autoritetet lokale kanë nisur hetimet për të zbardhur rrethanat e aksidentit.
