Detaje tronditëse kanë dalë nga krimi makabër i ndodhur mëngjesin e së premtes në Volos të Greqisë, ku një 40-vjeçar shqiptar vrau bashkëshorten e tij, nënë e katër fëmijëve.
Sipas mediave greke, ngjarja ndodhi pas një sherri të ashpër në apartamentin e çiftit. 36-vjeçarja Nicoletta M. u përpoq të shpëtonte duke dalë me vrap nga banesa, por burri i saj e ndoqi me thikë në dorë deri në hyrje të pallatit. Atje e goditi me dhunë në qafë, duke i shkaktuar plagë fatale. Gruaja fatkeqe u rrëzua mes xhamave të thyer dhe u mbulua në gjak, ndërsa agresori u largua menjëherë me vrap në rrugën Gladstonos.
Pamjen e tmerrshme e pa vajza e çiftit, vetëm 16 vjeç, e cila lajmëroi mes lotësh shërbimet e urgjencës: “E pashë babin duke therur mamin me thikë”. Ajo mbërriti e para pranë trupit të nënës së saj dhe në gjendje shoku njoftoi ambulancën.
Fqinjët treguan të tronditur se viktima ishte një grua e qetë, punëtore dhe e përkushtuar ndaj fëmijëve. “Ishte e mirë, kujdesej vetëm për shtëpinë dhe fëmijët. Ai ishte problematik, përdorues droge. Para dy muajsh kishte tentuar të vriste veten”, thanë ata për mediat vendase. Një dëshmitare tha se kishte dëgjuar se gruaja u ther në qafë nga bashkëshorti.
Policia ka rrethuar zonën dhe po kërkon autorin, i cili është ende në arrati. Ndërkohë, fëmijët e mbetur jetimë janë marrë nën kujdes nga autoritetet.
Sfondi i historisë tragjike: Çifti ishte zhvendosur vetëm pak muaj më parë në pallatin në rrugën Konstanta nr. 18. Ata kishin katër fëmijë, më i madhi 18 vjeç dhe më i vogli vetëm 6. Viktima punonte në një fabrikë për të siguruar të ardhura, ndërsa burri njihej për problemet me drogën dhe gjendjen e paqëndrueshme mendore.
Krimi ka tronditur jo vetëm qytetin e Volosit, por edhe komunitetin shqiptar në Greqi. Një nënë e re humbi jetën tragjikisht nga duart e bashkëshortit të saj, ndërsa katër fëmijë mbetën jetimë në një histori që dëshmon dhunën më të egër brenda familjes.
