Shqipëria sot paguan thuajse çmime europiane, por jeton me paga shqiptare. Ky është realiteti i hidhur që konfirmohet nga shifrat zyrtare: Indeksi i Harmonizuar i Çmimeve të Konsumit për korrikun 2025 u regjistrua në 2.4%, në të njëjtin nivel me mesataren e Bashkimit Europian. Pra, çmimet janë të njëjta, por të ardhurat mbeten disa herë më të ulëta.
Qeveria mundohet ta paraqesë këtë si sukses, duke theksuar se inflacioni është i ulët në krahasim me rajonin. Por çfarë vlere kanë këto statistika për qytetarët, kur rroga mesatare shqiptare nuk mbulon dot as gjysmën e shpenzimeve mujore? Shqiptarët e përballojnë jetën duke u zhytur në borxhe, duke pritur ndihmën e emigrantëve ose duke mbajtur dy e tre punë për të mbyllur muajin.
Në fqinjët tanë inflacioni është më i lartë: Maqedonia e Veriut 4.6%, Kosova 4.3%, Serbia 5%, Mali i Zi 4.7%, ndërsa më i larti u shënua në Rumani me 6.6%. Por, ndryshe nga ne, atje pagat janë më të larta dhe fuqia blerëse është më e madhe. Tek ne, përkundrazi, kostoja e jetesës është bërë barrë e papërballueshme.
Çmimet e shërbimeve kulturore dhe të argëtimit janë rritur me 12%, një luks që shumica e shqiptarëve as nuk e mendon dot. Edhe çmimet e restoranteve, kafeneve dhe pijeve janë rritur me 3.3%, ndërsa ushqimet bazë me 1.8%. Pra, shqiptarëve u bëhet më e shtrenjtë edhe buka e përditshme, edhe një kafe në lagje.
E vërteta është e thjeshtë: qeveria flet për stabilitet ekonomik, por qytetarët ndihen gjithnjë e më të varfër. Me paga që nuk përputhen me çmimet, Shqipëria është kthyer në një vend ku jeton “me kosto europiane, por me standard afrikan”. Dhe kjo është fytyra reale e politikave që mburren me shifra, por braktisin qytetarin në betejën e përditshme për mbijetesë.
