Zhdukja e mistershme e Daniel Shimës për gati 10 orë, e pasuar nga rikthimi i tij i papritur pranë familjes, vijon të ngrejë shumë pikëpyetje. Gazetarja Klodiana Lala, e ftuar në News24, deklaroi se rasti nuk është aq i thjeshtë sa shpjegimi që ka dhënë vetë Shima, sipas të cilit gjithçka ndodhi për shkak të një konflikti me partneren.
“Daniel Shima konsiderohej si truri kryesor i AKSHI-t. Kontaktin e fundit e pati me partneren, ku i dërgoi një mesazh se ‘po më arrestojnë’. Nga ai moment u dha alarmi. Kamerat e sigurisë e tregojnë lëvizjen e tij në Tiranë deri tek Tuneli i Elbasanit. Ai pretendon se shkoi në Borsh dhe gjatë kthimit bleu vezë, më pas shkoi tek gjyshja. Por unë nuk e shikoj si një ikje me dëshirë. Kjo çështje ka nevojë për hetim të thelluar,” tha Lala.
Ajo ngriti dyshime serioze se Shima mund të jetë kërcënuar për të heshtur, duke kujtuar se ai ka njohuri të thella për funksionimin dhe tenderat e AKSHI-t. “Daniel Shima di shumë. Nëse ai flet, mund të zhvillohen shumë hetime. Duhet hetuar nëse është kërcënuar, nëse ka nevojë për mbrojtje dhe nëse dikush është i interesuar që ai të heshtë. Nuk besoj se kemi të bëjmë me një konflikt banal familjar,” shtoi ajo.
Lala theksoi gjithashtu një tjetër element të rëndësishëm: sipas saj, Shima kohët e fundit kishte marrë para me fajde, gjë që e komplikon edhe më shumë historinë dhe mund të ketë sjellë presione shtesë mbi të.
Ky episod i pazakontë, i shoqëruar me mesazhin alarmant “po më arrestojnë”, i dërguar partneres së tij, dhe më pas zhdukja pa gjurmë për disa orë, mbetet i paqartë dhe lë hapur shumë skenarë. Mes hipotezave është një inskenim i qëllimshëm për t’iu shmangur hetimeve, presione nga ish-kolegë apo interesa të tjera, deri tek problemet financiare personale.
Ngjarja kërkon një hetim të thelluar, sepse vetëm kështu mund të kuptohet nëse kemi të bëjmë me një rast të inskenuar për të fituar kohë, apo me një çështje shumë më serioze, që lidhet me kërcënime reale dhe me sekretet që Shima mund të zotërojë për tenderat dhe aferat e AKSHI-t.
