Një ngjarje e rëndë dhe alarmante është regjistruar këtë të mërkurë në Tiranë, ku ish-zëvendësdrejtori i Përgjithshëm i Agjencisë Kombëtare të Shoqërisë së Informacionit (AKSHI), Daniel Shima, është denoncuar si i zhdukur nga familjarët e tij.
Sipas denoncimit të bërë nga nëna e tij në Komisariatin Nr. 1 rreth orës 17:00 të datës 20 gusht 2025, familja ka humbur çdo kontakt me 34-vjeçarin që prej mesditës. Burime nga hetimi bëjnë me dije se Shima ishte nisur për të marrë partneren e tij te Liqeni i Thatë, por në ato momente ka dërguar një mesazh ku shkruante: “Ndal Policia, po më arrestojnë”. Pas këtij komunikimi, telefoni i tij rezulton i fikur dhe vendndodhja mbetet e panjohur.
Policia ka nisur verifikimet duke sekuestruar pamjet e kamerave të sigurisë në zonat ku dyshohet se ka lëvizur Shima, ndërsa po gjurmohen tabulatet telefonike dhe po merren dëshmi nga persona të afërt. Familja ka deklaruar se nuk ka pasur asnjë informacion për vendndodhjen e tij prej paradites së sotme.
Kush është Daniel Shima? Ai ka qenë numri 2 i AKSHI-t, menjëherë pas drejtoreshës Mirlinda Karçanaj. Vetëm pak muaj më parë u shkarkua nga detyra, pikërisht në të njëjtën ditë që Karçanaj u thirr nga Prokuroria e Posaçme (SPAK) për t’u marrë në pyetje më 19 mars 2024. Pas daljes nga SPAK, Karçanaj është kthyer në zyrë dhe ka firmosur shkarkimin e Shimës.
Emri i tij u rikthye në qendër të vëmendjes publike kur ish-zëvendëskryeministri Arben Ahmetaj, nga arratia në korrik 2024, deklaroi në një intervistë se Shima ishte përfshirë në një përgjim ambiental të SPAK mbi tendera me vlerë 43 milionë euro përmes AKSHI-t. Ahmetaj theksoi asokohe se “AKSHI është tmerr dhe Danieli është kërcënuar nga vetë kryeministri që të mbyllë gojën”.
Ngjarja e zhdukjes së tij, në rrethana ende të paqarta, e bën edhe më të ndjeshme çështjen duke ngritur dyshime serioze për presione dhe kërcënime të lidhura me hetimet e tenderave publikë.
Kjo zhdukje është një sinjal alarmi jo vetëm për familjen e Daniel Shimës, por për opinionin publik. Thirrja tashmë është e qartë: SPAK duhet të marrë menjëherë në dorë hetimin e kësaj ngjarjeje, sepse rrethanat e zhdukjes së tij ngrejnë pikëpyetje të mëdha për atë që po fshihet pas saj.
