Një aksident i rëndë ka tronditur autostradën A8 në Gjermani pak pas mesnatës, pranë kryqëzimit të Irschenbergut, ku një autobus me pasagjerë nga Kosova është përplasur me një kamion të drejtuar nga një shtetas polak. Ngjarja ka shkaktuar panik dhe frikë të madhe mes udhëtarëve.
Në momentin e përplasjes në autobus ndodheshin 41 pasagjerë. Nga goditja e fortë 30 prej tyre mbetën të plagosur, ndërsa dy persona ndodhen në gjendje shumë të rëndë, duke luftuar për jetën. Ekipet e emergjencës dhe shërbimi i zjarrfikëses kanë mbërritur menjëherë në vendin e ngjarjes për të shpëtuar të mbijetuarit dhe për t’u ardhur në ndihmë të plagosurve.
Sipas policisë gjermane, autobusi ka tentuar të shmangë përplasjen në momentet e fundit duke devijuar majtas, por nuk ka mundur të ndalojë në kohë. Hetimet për shkaqet e aksidentit kanë nisur dhe deri tani nuk janë konstatuar defekte teknike në asnjërin nga mjetet e përfshira.
Pamjet e publikuara nga vendi i ngjarjes janë dramatike: pjesa e përparme e autobusit është shkatërruar pothuajse plotësisht, ndërsa kamioni ka marrë dëmtime të mëdha në pjesën e pasme. Pavarësisht dëmeve, shoferi i kamionit ka shpëtuar pa lëndime.
Mediat gjermane raportojnë se për pasagjerët e plagosur është ngritur një operacion i gjerë emergjent, me helikopterë dhe ambulanca të shumta që i kanë transportuar ata në spitalet e afërta. Situata mbetet kritike për dy prej tyre, ndërsa të tjerët po marrin trajtimin mjekësor të nevojshëm.
Ky aksident ka shkaktuar shqetësim të madh në komunitetin shqiptar në Gjermani dhe Kosovë, pasi autobusi ishte me pasagjerë që po udhëtonin drejt vendeve të ndryshme evropiane. Hetimet pritet të zbardhin detaje të tjera mbi shkaqet e përplasjes.
