Zjarri në Delvinë ka vijuar me intensitet të lartë edhe gjatë natës, duke u përhapur me shpejtësi drejt fshatit Vllahat dhe duke rrezikuar seriozisht jetët e banorëve. Flakët, të nisura fillimisht në Finiq, kanë kaluar në territorin e Delvinës, duke përfshirë disa zona dhe duke detyruar evakuimin e banorëve.
Për shkak të afrimit të zjarrit, pacientët dhe stafi mjekësor i spitalit të Delvinës janë zhvendosur urgjentisht, ndërsa bombolat e oksigjenit janë larguar për të shmangur rrezikun e shpërthimeve. Transferimi i pacientëve, personelit dhe pajisjeve është bërë përkohësisht në godinën e Pallatit të Kulturës.
Flakët kanë kërcënuar edhe puset e naftës në zonë, ndërsa banorët rrëfejnë momentet e frikshme dhe shpejtësinë me të cilën u përhap zjarri. Raportohet për disa shtëpi të djegura, megjithëse autoritetet njoftojnë se aktualisht nuk ka më rrezik për banesat.
Një ditë më parë, situata ishte tejet kritike edhe në Gramsh, ku humbi jetën një 80-vjeçar nga asfiksia pasi zjarri që kishte ndezur në oborr u përhap dhe përfshiu disa fshatra. Në këtë zonë, u evakuuan 9 fshatra për të mbrojtur banorët nga flakët.
Në Delvinë, tymi i dendur ka mbuluar të gjithë zonën, duke shkaktuar ndërprerje të energjisë elektrike. Autoritetet bëjnë me dije se pritet ndërhyrje nga ajri për të frenuar përhapjen e mëtejshme të zjarrit.
