Në kulmin e sezonit turistik, ndërsa disa familje po kthehen nga pushimet dhe të tjera sapo po i nisin, fëmijët po përballen me probleme të shpeshta shëndetësore si virozat dhe gastroenteritet, të cilat mjekët lidhin kryesisht me plazhet.
Sipas pediatrëve, grupmosha më e prekur janë fëmijët e vegjël, sidomos bebet, si dhe fëmijët në moshën 5-7 vjeç, të cilët shpesh paraqesin temperaturë të lartë dhe shqetësime të tjera që lidhen kryesisht me problemet gastrointestinale.
“Ka viroza në qarkullim, por më të shpeshta janë intoksikimet nga ushqimi, shoqëruar me dhimbje barku dhe të vjella. Gjithashtu nuk mungojnë rastet me temperaturë dhe çështje të ndryshme të lëkurës,” shpjegon mjekja pediatre Sonila Brati.
Pediatrët rekomandojnë që prindërit të kujdesen që fëmijët të mbeten të hidratuar gjatë ekspozimit në diell, duke shmangur lëngjet e konservuara dhe duke preferuar fruta stinore të larë mirë, si dhe konsum të rregullt të ujit.
