Prokuroria e Posaçme kundër Krimit të Organizuar dhe Korrupsionit ka nisur një operacion të gjerë në disa qytete të vendit, me qëllim goditjen e një grupi të përfshirë në trafikun ndërkombëtar të drogës.
Nga hetimet paraprake rezulton se ky grup kriminal importonte lëndë narkotike nga Amerika Latine dhe e trafikonte drejt vendeve të Evropës. Në kuadër të këtij operacioni janë urdhëruar 15 masa sigurie, përfshirë edhe kontrolle në banesa të ndryshme, të cilat janë kryer me vendim gjykate.
Mes të arrestuarve deri tani janë dy emra të njohur: Franc Çopja, kapur në Belgjikë, dhe Ervis Çela, i arrestuar një muaj më parë me akuzën për vrasje. Sipas burimeve, ndaj Çelës iu komunikua edhe akuza për trafik droge gjatë qëndrimit në burg.
Ndersa, operacioni vijon në qytetet Tiranë, Durrës dhe Elbasan, janë arrestuar gjithsej tre persona, ndërsa katër të tjerë, që ndodheshin në burg për akuza të tjera, janë njoftuar për arrestin e ri në kuadër të këtij hetimi.
Të dyshuarit janë identifikuar edhe përmes përgjimeve të aplikacionit të koduar “Sky ECC”, ku rezultojnë të përfshirë në rrjetin ndërkombëtar të trafikut të kokainës.
