Një ngjarje e rëndë ka tronditur zonën e Llogarasë në Vlorë, ku 22 kuaj janë qëlluar me armë zjarri tip çifte.Nga sulmi, katër kuaj janë vrarë, ndërsa tre të tjerë kanë mbetur të plagosur dhe janë duke marrë trajtim mjekësor.
Ngjarja ka ndodhur rreth katër ditë më parë në afërsi të zonës Gropat e Pirit, në Dukat-Llogara.
Pronari i kafshëve, Foni Konomi, shprehet i tronditur dhe nuk mund ta kuptojë se si dikush mund të qëllojë me armë një kafshë kaq të pafajshme si kali.
Sipas informacioneve të para, dyshohet se autorët janë gjuetarë të paligjshëm, të cilët kanë vepruar gjatë natës.
Burime nga zona bëjnë me dije se motivi mund të lidhet me konkurrencën ose konflikte mes pronarëve që zhvillojnë guida me kuaj. Disa prej kafshëve të qëlluara ishin të lira në pyjet e Llogarasë për t’u parë nga turistët, ndërsa të tjera përdoren për shëtitje dhe guida turistike.
Sipas banorëve, ky nuk është rasti i parë që kafshët në këtë zonë goditen me armë.
Aktivistët për mbrojtjen e kafshëve dhe komuniteti lokal kërkojnë hetim të plotë të rastit, ndëshkim për autorin dhe marrjen e masave ligjore për të mbrojtur kafshët e lira nga dhuna. Ata theksojnë se mungesa e reagimit institucional vetëm sa inkurajon përsëritjen e akteve të tilla mizore.
Policia vijon hetimet intensive për të identifikuar dhe arrestuar autorët e këtij akti të rëndë.
