Kryeministri i Kosovës, Albin Kurti, ka reaguar sot lidhur me situatën politike në vend, duke e cilësuar si të rëndë mungesën e konstituimit të institucioneve dhe të Kuvendit.
Gjatë një vizite në një prej klinikave të Qendrës Klinike Universitare të Kosovës, Kurti deklaroi për gazetarët se dëmi i shkaktuar nga ngërçi institucional është i madh dhe se qytetarët duhet të tregojnë edhe pak durim, derisa Gjykata Kushtetuese të japë një vendim.
“Mendoj që duhet të presim edhe fare pak ditë. Do të na njoftojnë për atë që mendojnë se do të ndodhë pas afatit 30-ditor. Nuk e di cila do të jetë zgjidhja, por ajo që është e sigurt, është se ne do ta respektojmë aktgjykimin e Gjykatës Kushtetuese,” u shpreh Kurti.
Ai theksoi se mungesa e Kuvendit po ndikon negativisht në funksionimin e vendit dhe në jetën e qytetarëve.
Kujtojmë se në fund të muajit korrik, Gjykata Kushtetuese urdhëroi pezullimin e çdo vendimi dhe veprimi nga ana e deputetëve, deri më 8 gusht, për të mundësuar shqyrtimin e çështjes që lidhet me konstituimin e Kuvendit të Kosovës.
