Anija me vela “Bel Espoir”, një simbol i shpresës dhe historisë detare, ka mbërritur këtë të hënë në portin e Durrësit, duke sjellë me vete një histori të pasur mbi detin dhe solidaritetin njerëzor.
Kjo skunë 81-vjeçare, e ndërtuar në vitin 1944 në qytetin Svendborg të Danimarkës nga kantieri detar J. Ring Andersen, nisi jetën e saj si anije tregtare në Detin Baltik dhe më vonë si anije peshkimi në ujërat e thella të Terre-Neuve. Por rrugëtimi i saj më domethënës fillon në vitin 1968, kur shoqata franceze AJD (Amis du Jeudi-Dimanche) e bleu anijen me një qëllim të veçantë: të ndihmojë të rinjtë me probleme sociale dhe të varur përmes eksperiencës transformuese të jetës në det.
Nën drejtimin e themeluesit të shoqatës, ish-kapelanit Michel Jaouen, “Bel Espoir” u kthye në një mjet edukimi dhe rikthimi në jetë për shumë të rinj në vështirësi. Prej dekadash, ajo nuk është më thjesht një anije, por një platformë shprese, ku ndërthuren udhëtimet detare me rikuperimin social.
Në vitin 1993, Franca e njohu vlerën e saj kulturore dhe simbolike duke e shpallur monument kombëtar lundrues. Që prej atëherë, “Bel Espoir” ka vijuar të lundrojë mes Karaibeve dhe brigjeve franceze, duke mishëruar misionin e saj të veçantë: të ofrojë një rrugë drejt ndryshimit dhe shpresës përmes fuqisë së detit.
