Dy vëllezër janë shpallur në kërkim nga policia pas një incidenti me armë zjarri në autostradën “Durrës-Tiranë”. Ngjarja ndodhi rreth orës 01:00 të mëngjesit të 3 gushtit, pas një konflikti verbal lidhur me një manovër parakalimi.
Policia identifikoi dy vëllezërit Emiljano dhe Elton Domi, përkatësisht 46 dhe 40 vjeç, banues në fshatin Xhafzotaj, si personat që dyshohen se qëlluan në drejtim të automjetit ku udhëtonte 35-vjeçari L.Sh.
Sipas hetimeve paraprake, pas debatit verbal me drejtuesin e mjetit, dy vëllezërit përdorën armën për të qëlluar në automjet, duke shkaktuar dëmtime tek L.Sh., i cili fatmirësisht ndodhet jashtë rrezikut për jetën.
Policia po vijon me operacionet intensive për kapjen e të dyshuarve, ndërsa materialet i janë dërguar Prokurorisë së Durrësit për veprime të mëtejshme.
