Një ngjarje tragjike ka tronditur qytetin e Palermos, ku Simona Cinà, një 20-vjeçare e njohur si sportiste e volejbollit, humbi jetën në rrethana ende të paqarta gjatë një feste diplomimi në një vilë me pishinë në zonën e Bagherias, Itali.
Vdekja e papritur e saj ka lënë pas një sërë pikëpyetjesh, ndërsa familjarët kërkojnë me ngulm të zbardhet e vërteta.
Motra binjake e saj, Roberta Cinà, ka treguar për momentin kur mbërritën në vendngjarje: “Kur mbërritëm, Simona ishte e shtrirë buzë pishinës, e mbuluar me një peshqir, vetëm me rrobat e banjës. Rrobat nuk i gjetëm askund, vetëm këpucët.”
Ajo shtoi se Simona kishte me vete një byzylyk të nënës së tyre, të cilin e ruante gjithmonë në çantë: “Ky është një detaj që tregon se ajo ishte e vetëdijshme dhe në kontroll të vetes.”
Prindërit e vajzës, Giusy dhe Luciano Cinà, po kërkojnë të kuptojnë se çfarë ndodhi realisht me të bijën.
“Vajza jonë ishte sportive, nuk konsumonte drogë, rrallëherë pinte ndonjë gotë dhe i kushtonte shumë rëndësi trupit dhe shëndetit të saj,” deklaron nëna e saj.
Ndërsa babai mbetet i tronditur nga ajo që pa:
“Ishin vetëm shishe uji, asnjë shenjë feste të mirëfilltë. Kush i zhduku alkoolin? Askush nuk na telefonoi për të na njoftuar çfarë kishte ndodhur.”
Edhe vëllai dhe motra e saj kanë përshkruar një atmosferë të pazakontë në vilë: “Të gjithë ishin të lagur dhe në heshtje. Nuk kishte tortë, nuk kishte muzikë, konsolla muzikore ishte zhdukur. Si është e mundur që kjo vilë nuk u sekuestrua menjëherë, por përkundrazi, u përgatit për një tjetër festë disa orë më vonë?”
Avokati i familjes, Gabriele Giambrone, thekson se ka shumë rrethana të dyshimta dhe kërkon që drejtësia të veprojë: “Ka shumë gjëra të dyshimta. Kërkojmë që drejtësia të veprojë dhe të përcaktohet qartë se çfarë ndodhi me Simonën.”
Hetimet janë marrë në dorë nga prokuroria e Termini Imerese, ndërsa ngjarja ka marrë vëmendje të gjerë në mediat italiane dhe ka ngjallur reagime të forta në publik.
Në pritje të autopsisë dhe hetimeve të mëtejshme, familja Cinà kërkon vetëm një gjë: të marrë përgjigje për fatin e vajzës së tyre, një sportiste e re, plot jetë, që u nda në mënyrë të pashpjegueshme.
