Më shumë se 60 emigrantë kanë humbur jetën pasi një anije e mbingarkuar u mbyt pranë brigjeve të provincës Abyan në jug të Jemenit, si pasojë e motit të keq.
Sipas raportimeve nga Organizata Ndërkombëtare për Migracionin (IOM), deri tani janë konfirmuar 68 viktima, ndërsa dhjetëra të tjerë rezultojnë ende të zhdukur.
Anija, që transportonte rreth 157 persona, kryesisht shtetas etiopianë, ishte nisur përgjatë një prej rrugëve më të rrezikshme të migrimit në rajon, e cila përdoret shpesh nga kontrabandistët e njerëzve për të kaluar emigrantët nga Afrika drejt shteteve të pasura të Gjirit.
Shefi i IOM-it në Jemen, Abdusattor Esoev, deklaroi për mediat ndërkombëtare:
“68 persona janë vrarë, por vetëm 12 nga 157 personat janë shpëtuar deri më tani. Fati i të zhdukurve nuk dihet ende.”
Autoritetet lokale në Abyan kanë konfirmuar se forcat e sigurisë po zhvillojnë një operacion të gjerë kërkim-shpëtimi, ndërsa trupat e pajetë po gjenden përgjatë një zone të gjerë të vijës bregdetare.
Pavarësisht konfliktit të brendshëm që prej vitit 2014, Jemeni mbetet një nyje e rëndësishme për migrimin e paligjshëm nga Briri i Afrikës. Çdo vit, mijëra emigrantë përshkojnë të ashtuquajturën “Rruga Lindore”, që nis nga Xhibuti dhe kalon nëpër Detin e Kuq për të mbërritur në Jemen, me synimin për të arritur më tej në vendet e Gjirit Arab.
Sipas IOM-it, vetëm vitin e kaluar janë regjistruar të paktën 558 viktima përgjatë kësaj rruge, 462 prej të cilave humbën jetën nga fundosja e anijeve. Në muajt e fundit, rastet e vdekjeve dhe zhdukjeve në det janë shtuar ndjeshëm, për shkak të mbingarkesës së anijeve dhe kushteve të rrezikshme të udhëtimit.
