Pas skandalit të ndodhur në Kumanovë gjatë ndeshjes së basketbollit Maqedoni – Rumani, Federata e Basketbollit e Maqedonisë së Veriut ka reaguar ashpër ndaj thirrjeve nacionaliste dhe gjuhës së urrejtjes të përdorura nga një pjesë e tifozëve.
Në deklaratën zyrtare, Federata dënon veprimet fyese që u dëgjuan në tribuna, duke theksuar se këto sjellje nuk përfaqësojnë vlerat dhe identitetin e saj. “Sloganet nacionaliste, gjuha e urrejtjes dhe nxitja e intolerancës nuk kanë vend në tribuna, as në sport në përgjithësi”, thuhet në deklaratë, ku gjithashtu u bëhet thirrje të gjithë tifozëve që të përmbahen nga sjellje të tilla dhe të kontribuojnë në krijimin e një atmosfere pozitive, të sigurt dhe gjithëpërfshirëse në ambientet sportive.
Gjatë ndeshjes së zhvilluar në Kumanovë, një pjesë e tifozëve brohorisnin me tone raciste dhe nacionaliste, duke përdorur fraza të rënda si: “Le ta kuptojnë shqiptarët e mallkuar, emri maqedonas nuk do të zhduket. Maqedoni e pastër, e pastër, e pastër”.
Në tribunat e ndeshjes ishin të pranishëm edhe figura të larta të shtetit, përfshirë kryeministrin Hristijan Mickoski, kryetarin e Komunës së Kumanovës Maksim Dimitrievski, ministrin e Punëve të Jashtme Panço Toshkovski dhe zëvendëskryeministrin Ivan Stoilkoviq. Megjithatë, deri më tani, asnjë prej tyre nuk ka reaguar publikisht për ngjarjen.
