Gjykata e Vlorës ka vendosur masën e sigurisë “arrest me burg” për Kleanth Bylykun, i njohur edhe me emrin Armando Gega, i dyshuar si bashkëpunëtor në vrasjen e Renato Hoxhajt, ngjarje e ndodhur më 27 prill në qytetin bregdetar.
Seanca gjyqësore ndaj 42-vjeçarit u zhvillua ditën e djeshme, pak ditë pasi ai u arrestua nga Policia e Shtetit më 1 gusht, ndërsa udhëtonte me një mjet tip Audi të bardhë. Bylyku akuzohet për veprën penale “Vrasje me paramendim”, kryer në bashkëpunim.
Sipas hetimeve, ai ka luajtur një rol kyç në organizimin e ngjarjes. Ditën e vrasjes, ai ka udhëtuar në të njëjtin automjet me autorin ekzekutor, një shtetas rumun, i cili është larguar më pas nga Shqipëria përmes pikës kufitare në Qafë Botë. Hetuesit bëjnë me dije se Bylyku jo vetëm që e ka ndihmuar me lëvizjet, por i ka dhënë informacion mbi lëvizjet e viktimës dhe i ka siguruar armën e krimit.
Autoritetet po vijojnë hetimet për të dokumentuar plotësisht rrethanat dhe për të vënë përpara drejtësisë të gjithë të përfshirët në këtë ngjarje të rëndë.
