Gjimnastika shqiptare ka shënuar një sukses të rëndësishëm në skenën ndërkombëtare, duke fituar medaljen e bronztë në kampionatin botëror “World Gym for Life Challenge”, i zhvilluar në Portugali.
Performanca mbresëlënëse e vajzave kuqezi u vlerësua lartë nga juria, duke u përmendur si një nga momentet më emocionuese të garës.
Në këtë event prestigjioz morën pjesë përfaqësues nga 33 vende të botës, ndërsa në total në Lisbonë ishin të pranishëm rreth 3800 sportistë.
Shqipëria u përfaqësua nga gjimnastet Merili Islami, Mishela Bitanji, Maria Zefi, Sara Moleci, Nil Elbasani, Nadia Daci, Enesa Sulaj, Chloe Qenanaj, Ilenia Sevdari, Silja Muhameti, Megi Papadhami, Iris Kadiu, Leandra Çela dhe Melisa Agolli, të gjitha në moshë nga 7 deri në 12 vjeç.
Ky rezultat i shkëlqyer është fryt i punës së palodhur të trajnerëve të ekipit kombëtar, mbështetjes së Sekretares së Përgjithshme të Federatës, Eliriana Karaj, si dhe kontributit të presidentit të federatës, Leonard Lulaj.
Gjimnastet që përfaqësuan Shqipërinë vijnë nga klubet sportive të Beratit, Shkodrës, Lushnjes dhe Tiranës, duke dëshmuar për një angazhim të gjerë në të gjithë vendin për rritjen dhe zhvillimin e këtij sporti.
