Abdyl Xhaja, një nga figurat qendrore të qeverisjes shqiptare në periudhën e tranzicionit të hershëm, është ndarë nga jeta në moshën 82-vjeçare.
Lajmi për ndarjen e tij është bërë i ditur nga familjarët përmes rrjeteve sociale.
Xhaja lindi më 13 mars 1943 në Elbasan dhe përfundoi studimet në Fakultetin Ekonomik të Universitetit të Tiranës në vitin 1965, duke u diplomuar si ekonomist në fushën e industrisë.
Karriera e tij nisi në qytetin e lindjes, ku shërbeu si ekonomist dhe më pas mori detyra drejtuese në Kombinatin Metalurgjik të Elbasanit.
Në vitet e ndryshimeve të mëdha politike, Xhaja u bë një nga emrat më të rëndësishëm në strukturat qeverisëse.
Ai ka mbajtur disa poste kyçe, përfshirë:
• Zëvendësministër i Burimeve Minerare dhe Energjetikës (1991)
• Zëvendëskryeministër i Shqipërisë (1991–1992)
• Ministër i Burimeve Minerare dhe Energjetikës (1991–1992, 1994–1997)
• Ministër i Industrisë, Burimeve Minerare dhe Energjetikës (1992–1994)
• Deputet i Partisë Demokratike (1996–1997)
• Anëtar i Këshillit Kombëtar të PD-së (1995–1997)
Pas vitit 1997, ai u tërhoq nga politika aktive, por vijoi angazhimin në fusha teknike dhe këshillimore, duke bashkëpunuar me institucione vendase dhe ndërkombëtare. Ka qenë këshilltar i Unionit të Investitorëve të Huaj dhe pranë Shërbimit Gjeologjik Shqiptar.
