Një person i tretë është arrestuar nga policia në lidhje me vrasjen makabre të 56-vjeçarit Anesti Rama, ngjarje e ndodhur dy ditë më parë në Fier.
Bëhet fjalë për Çlirim Doganin, 55 vjeç, banues në fshatin Arapaj të Roskovecit, i cili dyshohet se ka bashkëpunuar me vajzën e viktimës, Ermalinda Rama, për kryerjen e krimit.
Sipas Policisë, Dogani ka ndihmuar 26-vjeçaren për të mbytur të atin me tel, si dhe për përdorimin e sendeve të forta dhe mjeteve prerëse gjatë aktit të dhunshëm.
Menjehere pas vrasjes, u arrestuan Ermalinda Rama si autore, dhe nëna e saj Valbona Rama, e cila akuzohet se ka ndihmuar për të inskenuar ngjarjen si një aksident.
Ndërkohë, dëshmitë e të afërmve dhe banorëve të fshatit Frashër të Fierit hedhin dritë mbi një situatë të dhunshme brenda familjes.
Të afërmit dhe fqinjët kanë treguar se Anesti Rama ishte viktimë e dhunës së vazhdueshme psikologjike dhe fizike nga bashkëshortja dhe vajza. Ata thonë se ai izolohej në dhomë, nuk ushqehej rregullisht dhe nuk kishte akses në të ardhurat e veta.
Kunata e viktimës ka deklaruar:
“Kishin edhe probleme, se tani çifti ka probleme në shtëpi, por edhe çupën nuk e njoh aq mirë se unë kam qenë në Delvinë. Lekët që punonte, i kishin hedhur ata të punës a nuk e di, edhe me pasaportën e tyre venin merrnin lekët. Lekët ky nuk i merrte dot në dorë, se nuk i njihte lekët, vetëm se punonte, lekë në xhep ai nuk mori asnjëherë.”
Fqinji i viktimës:
“Faktikisht ai nuk dinte shkrim e këndim, ato e kishin bërë me prokurë që tërhiqnin lekët nga banka. Ajo që thotë vajza, që ka deklaruar se nuk i jepte lekë, janë gënjeshtra. Hani çfarë u donte qejfi vetë atyre. Unë si komshi ndonjëherë i pyesja e ushqeni apo nuk e ushqeni, se kohët e fundit ishte dobësuar shumë. I japim ushqim, thoshin, ndoshta mund t’i kishin dhe gënjeshtra. Por gjithmonë i bërtisnin.”
Ndërsa vajza e dytë e viktimës, e cila jeton në Itali, rrëfen momentet e para kur mori lajmin për vdekjen e të atit.
“Ngjarja e mësova nga ora 20:00, më ka marrë motra në telefon, që babi kishte rënë në banjo. Më tha kështu: ‘O motra, ka rënë babi në banjo’. I thashë ç’po thua? Edhe fiku telefonin. Pastaj e marr pas 5 minutash, edhe më thotë mami ik se po merremi me babin, se po e vishnin a po e lanin nuk e di, edhe e fika prapë telefonin. Fillova pastaj të merrja kunatën time, se i rashë mamit prapë e nuk ma hapi telefonin. Mora kunatën që të vinte këtu e të merrja vesh, se nuk po e besoja. Kur po e lante mami, dëgjova një zë dhe i thashë: Mami, babi është gjallë? Jo, tha, ka vdekur. Kaq ishte. Unë me prindërit e me motrën kam folur gjithmonë, flisja përditë, flisja me babin, ishte çdo gjë në rregull.”
Nipi i viktimës ka deklaruar gjithashtu:
“Kur sa e pashë, pashë goditjen që kishte në ballë, edhe kishte shumë gjak mbrapa kokës, domethënë që ishte vrarë dhe mbrapa kokës. Kurse nga ajo që kishim dëgjuar që e kishin gjymtuar edhe poshtë, e vura re dhe kishte dy prerje. Tani nuk e di nëse ato prerjet ishin nga autopsia ose ishin nga dhuna, por e di që ishte i prerë.”
Autopsia pritet të përcaktojë shkaqet e vdekjes dhe natyrën e plagëve, ndërkohë që hetimet vazhdojnë për të zbuluar rolin e saktë të secilit prej të përfshirëve në këtë krim të rëndë familjar.
