Denis Bajri, i arrestuar në shkurt 2024 në Emiratet e Bashkuara Arabe, u ekstradua sot drejt Shqipërisë. Operacioni ndërkombëtar policor, i koduar “The Wanted”, përfundoi me sukses pasditen e sotme rreth orës 16:30, duke sjellë në vend Bajrin, 37 vjeç.
Bajri ishte shpallur në kërkim ndërkombëtar nga Gjykata e Posaçme e Shkallës së Parë për Korrupsionin dhe Krimin e Organizuar në Tiranë, e cila kishte caktuar ndaj tij masën e sigurisë “arrest në burg”.
Ai akuzohet për disa vepra të rënda penale, përfshirë vrasjen me paramendim në formë të bashkëpunimit në grup kriminal të strukturuar, prodhimin dhe mbajtjen pa leje të armëve luftarake dhe municioneve, si dhe krijimin e kushteve materiale për kryerjen e vrasjeve në kuadër të veprimtarisë kriminale të organizuar.
Pas përfundimit të procedurave të ekstradimit, Bajri iu dorëzua Drejtorisë së Përgjithshme të Burgjeve për vuajtjen e masës së sigurisë.
Sipas hetimeve, Denis Bajri, i njohur ndryshe edhe me mbiemrin Brajoviç, dyshohet si përgjegjës për vrasjen e Gjin Ndojit, e kryer në gusht 2020. Vrasja, sipas përgjimeve të sekuestruara në aplikacionin “SKY” gjatë operacionit “Metamorfoza”, ishte organizuar nga Behar Bajri.
Ekzekutori i atentatit raportoi me mesazhe pranimin e detyrës dhe përfundimin e saj me sukses, ndërsa përdori kodin “Kryvi” për t’i njoftuar Ervis Martinajt se misioni ishte realizuar.
Gjin Ndoji, viktima e këtij atentati, njihej gjithashtu me emrat Gjin Boriçi ose Ndue Gjini.
