Gjykata e Posaçme e Apelit ka ndryshuar vendimin e Shkallës së Parë dhe ka dënuar me 3 vite burg Aleksandër Lahon, i njohur ndryshe si “Rrumi i Shijakut”, por për shkak të gjykimit të shkurtuar dënimi i tij përfundimtar u ul në 2 vite.
Laho është shpallur fajtor për veprën penale të “Korrupsionit aktiv ndaj personave që ushtrojnë funksione publike”, vepër që dyshohet se e ka kryer në bashkëpunim me zyrtarë shtetërorë.
Megjithëse vendimi është shpallur më 23 korrik 2025 nga trupa gjykuese e përbërë nga gjyqtarët Saida Dollani, Dhimitër Lara dhe Engert Pëllumbi, Laho vazhdon të jetë në kërkim prej vitesh dhe nuk ka qenë i pranishëm në asnjë prej seancave gjyqësore.
Sipas SPAK, Aleksandër Laho ka tentuar të ndikojë në një çështje gjyqësore për pronësinë e një sipërfaqeje prej 45 mijë metrash katrorë në zonën e Gjirit të Lalzit, duke i dhënë ryshfet një zyrtari të Avokaturës së Shtetit, Irgen Kërçuku.
Bëhet fjalë për 600 mijë lekë që u dhanë në mënyrë të drejtpërdrejtë, ndërsa ishin premtuar edhe 300 mijë lekë të tjera, në këmbim të mosapelimit të vendimit që favorizonte tjetërsimin e tokës publike.
Denoncimi për këtë aferë ka ardhur nga Pal Seçuni, i cili në atë kohë kishte kundërshtuar veprimet e Hipotekës së Durrësit dhe pretendonte për abuzime në regjistrimin e pronës.
Kjo çështje u bë publike fillimisht në vitin 2019, kur Laho mbeti i plagosur në atentatin ndaj prokurorit të Durrësit, Arjan Ndoja. Pas ngjarjes, hetuesit sekuestruan telefonin e Lahos, ku u zbulua një video komprometuese që tregonte komunikimin e tij me një përfaqësues të Avokaturës së Shtetit lidhur me rastin në fjalë.
Irgen Kërçuku, zyrtari i përfshirë në këtë skemë korruptive, është dënuar ndërkohë me 2 vite burg. Ndërsa Laho, edhe pse i dënuar, mbetet i pakapshëm për drejtësinë shqiptare. Avokati i tij ka pretenduar se ai ndodhet në gjendje të rënduar shëndetësore pas atentatit të vitit 2019, ku sipas mbrojtjes, ai ka mbetur i dëmtuar fizikisht, duke humbur funksionin e njërit prej gjymtyrëve.
Pavarësisht pretendimeve për gjendjen shëndetësore, autoritetet nuk kanë mundur ende të ekzekutojnë masën e dënimit ndaj Lahos.
