Sot pritet të shembet edhe godina e fundit pa leje në Theth, në përmbyllje të një aksioni disa ditor që ka sjellë përplasje dhe tensione mes banorëve vendas, forcave të IKMT-së dhe Policisë së Shtetit.
Një grup qytetarësh dhe aktivistësh nga Mirdita janë nisur këtë të martë drejt Thethit, në një akt solidariteti me komunitetin e zonës së Dukagjinit.
Nisma mban moton “Mirdita solidarizohet me Dukagjinin” dhe ka si synim të japë një mesazh të fuqishëm mbështetjeje për banorët e Shalës dhe të Shoshit, të cilët përballen me sfida që kërcënojnë jetesën, trashëgiminë kulturore dhe të ardhmen në këto treva historike.
Pjesëmarrësit nga Mirdita theksuan se kjo nismë nuk është thjesht simbolike, por një thirrje për ndërgjegjësim dhe veprim konkret në mbrojtje të vlerave, tokës dhe dinjitetit njerëzor.
Sipas tyre, “Mirdita solidarizohet me Dukagjinin” nuk është vetëm një slogan, por një mesazh i qartë se bashkimi dhe ndërgjegjësimi shoqëror janë forcat më të fuqishme për mbrojtjen e të drejtave dhe trashëgimisë kombëtare.
