Të paktën 82 palestinezë humbën jetën të dielën si pasojë e një serie sulmesh ajrore të ushtrisë izraelite në Rripin e Gazës.
Sipas autoriteteve shëndetësore, mes viktimave ka fëmijë, mjekë dhe civilë që ndodheshin pranë pikave të furnizimit me ujë apo në tendat e të zhvendosurve.
Sulmet goditën disa zona të populluara në të gjithë territorin, përfshirë qytetin e Gazës, Khan Younis dhe veriut e enklavës. Në lagjet Zeitoun dhe Al-Tuffah të qytetit të Gazës, gjashtë persona u vranë dhe dhjetëra të tjerë mbetën të plagosur.
Në qytetin verior të Gazës dhe në jug, në Khan Younis, u raportuan të paktën pesë viktima të tjera dhe 25 të plagosur, si pasojë e goditjes së tendave ku ishin strehuar të zhvendosurit.
Një tjetër sulm goditi një grumbullim civilësh në qytetin e Gazës, duke lënë të vrarë 11 persona, përfshirë një mjek dhe një fëmijë, ndërsa mbi 50 të tjerë u plagosën.
Në kampin e refugjatëve Shati, në veri të enklavës, avionët luftarakë izraelitë bombarduan një banesë, duke shkaktuar vdekjen e gjashtë personave. Po atë ditë, pesë të tjerë humbën jetën nga një sulm tjetër në Rrugën Hamid, në pjesën perëndimore të qytetit.
Në lagjen Al-Sabra, një vajzë e mitur dhe një tjetër civil mbetën të vrarë kur një shtëpi familjare pranë Xhamisë së Kompleksit Islam u godit nga bombardimet.
Sipas autoriteteve vendore, mes viktimave janë edhe 10 persona që po përpiqeshin të mbushnin ujë në kushte ekstreme të mungesës së furnizimit. Spitalet dhe qendrat shëndetësore në Gaza po përballen me një fluks të madh të plagosurish, ndërsa sistemi shëndetësor është pranë kolapsit.
Situata humanitare në Rripin e Gazës vazhdon të përkeqësohet në mënyrë dramatike.
