Një 37-vjeçar i identifikuar si Ndriçim Sula është arrestuar në Tiranë, pasi rezultoi i shpallur në kërkim nga autoritetet spanjolle për mashtrim të rëndë në kuadër të një organizate kriminale.
Sula u ndalua këtë të hënë nga Policia Rrugore, teksa po përdorte celularin gjatë drejtimit të mjetit. Gjatë verifikimit të identitetit, u zbulua se ai ishte subjekt kërkimi ndërkombëtar nga drejtësia spanjolle, si pjesë e rrjetit kriminal të drejtuar nga Amant Josifi.
Ky i fundit është nën hetim për mashtrime nëpërmjet “Call-Center”-ave, me një dëm të përllogaritur në rreth 2.4 miliardë euro. Josifi, i kërkuar nga disa shtete, dyshohet se është arrestuar në Dubai. Më parë ai ka mbajtur edhe detyrën e këshilltarit të ish-ministres së Mbrojtjes, Olta Xhaçka.
Ndriçim Sula akuzohet nga Gjykata e Seu de Urgell në Spanjë për “mashtrim me pasoja të rënda”, kryer si pjesë e një organizate kriminale, dhe ndaj tij është caktuar masa e sigurisë “arrest në burg”. Policia shqiptare ka nisur tashmë procedurat për ekstradimin e tij drejt Spanjës.
