Të dielën, më 14 korrik, Kuvendi i Kosovës do të mblidhet për herë të 46-të në përpjekje për t’u konstituuar pas zgjedhjeve të 9 shkurtit.
Seanca është caktuar për në orën 11:00, ndërkohë që procesi vijon të mbetet i bllokuar, ende pa zgjedhjes së kryetarit të Kuvendit.
Lëvizja Vetëvendosje, si partia fituese, ka propozuar Albulena Haxhiun për kryetare parlamenti, por kandidatura e saj nuk ka marrë mbështetje nga opozita.
Partia Demokratike e Kosovës dhe Aleanca për Ardhmërinë e Kosovës e kanë kundërshtuar hapur këtë emër, duke e konsideruar si figurë përçarëse dhe duke i kërkuar VV-së të propozojë një kandidat tjetër për të tejkaluar ngërçin.
Përplasjet politike po e zvarrisin një hap procedural të domosdoshëm: zgjedhjen e kryetarit dhe pesë nënkryetarëve të Kuvendit, pa të cilët nuk mund të ecet më tej drejt formimit të institucioneve të reja.
Gjykata Kushtetuese, në një qëndrim të dhënë më 26 qershor, i kujtoi Kuvendit detyrimin që konstituimi të përmbyllet brenda 30 ditësh nga certifikimi i rezultateve, por nuk dha një interpretim të qartë mbi pasojat në rast mosrespektimi të afatit.
Në përballje me këtë situatë të tensionuar dhe pa zgjidhje, presidentja Vjosa Osmani ka ftuar krerët politikë për konsultime dhe ka paralajmëruar se, në mungesë të konsensusit, mund t’i drejtohet sërish Gjykatës Kushtetuese për interpretim shtesë.
Për sa kohë nuk zgjidhet kryetari i Kuvendit, nuk mund të konstituohet përbërja parlamentare dhe as të formohet qeveria e re. Deri atëherë, vendi mbetet në një ngërç të thellë institucional.
