Një ngjarje e rëndë është shënuar këtë të premte në plazhin e Lungomares, në Vlorë, ku një nënë dhe vajza e saj, të dyja shtetase të huaja, janë rrezikuar të mbyten në det.
Sipas burimeve mjekësore, të dyja janë nxjerrë nga uji nga pushuesit që ndodheshin pranë vendit të ngjarjes dhe janë dërguar me urgjencë në spitalin rajonal të Vlorës.
Në momentin e mbërritjes, nënë e bijë kanë paraqitur shenja jete, por gjendja e tyre mbetet kritike.
Aktualisht, ato ndodhen të intubuara dhe sipas mjekëve, shanset për t’i mbijetuar rrezikut për jetën janë shumë të pakta.
Sipas dëshmitarëve në vendin e ngjarjes, nuk ka pasur persona për t’u dhënë ndihmën e parë profesionale. Pushuesit kanë tentuar t’i ndihmojnë, por mundësitë kanë qenë të kufizuara.
Policia dhe shërbimet emergjente kanë mbërritur në kohë dhe kanë mundësuar transportimin e tyre drejt spitalit.
