Gjykata e Lartë ka vendosur të lërë në fuqi vendimin nr. 13 “87 2025 85”, datë 13 mars 2025, të Gjykatës së Apelit për Korrupsionin dhe Krimin e Organizuar, duke refuzuar kështu kërkesën për lirimin nga masa e sigurisë të kryetarit të Bashkisë së Tiranës, Erion Veliaj.
Vendimi konfirmon masën e sigurisë “arrest me burg” të dhënë nga gjyqtari Engert Pëllumbi në Apelin e GJKKO-së, duke e mbajtur Veliajn pas hekurave ndërsa hetimet e SPAK vijojnë mbi një sërë akuzash të rënda që rëndojnë mbi të.
Veliaj u arrestua më 10 shkurt 2025 në ambientet e Bashkisë së Tiranës, pasi Prokuroria e Posaçme kundër Korrupsionit dhe Krimit të Organizuar ngriti fillimisht ndaj tij akuzat për “korrupsion pasiv i funksionarëve të lartë shtetërorë ose i të zgjedhurve vendorë”, kryer në bashkëpunim në nëntë raste, si dhe për “pastrimin e produkteve të veprës penale ose veprimtarisë kriminale”.
Më vonë, mbi Veliajn u shtua edhe një tjetër akuzë për “futjen e sendeve të ndaluara në qelitë e paraburgimit”, ndërsa më 22 maj Prokuroria regjistroi akuzën e katërt: “refuzim për deklarimin, mosdeklarim, fshehje ose deklarim të rremë të pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Kjo e fundit lidhet me një hetim të nisur për pasuri të padeklaruara në emër të çiftit Veliaj-Xoxa, pranë rezidencës “Kodra e Diellit”, ku familja jeton aktualisht. Në këtë kuadër, është regjistruar edhe një procedim penal ndaj bashkëshortes së kryebashkiakut, Ajola Xoxa.
Pas këtyre zhvillimeve, organet e drejtësisë urdhëruan sekuestrimin e vilës së familjes Veliaj në “Kodra e Diellit”, si pjesë e hetimeve mbi pasurinë e dyshuar të pajustifikuar.
Kështu, me vendimin e fundit të Gjykatës së Lartë, Erion Veliaj do të qëndrojë në paraburgim në pritje të zhvillimeve të mëtejshme gjyqësore.
