Policia e Tiranës zhvilloi sot një operacion si nëpër filma pas dyshimeve për një automjet që po transportonte armë zjarri në zonën e “Myslym Shyrit”.
Gjatë ndjekjes së mjetit, i cili drejtohej nga Skerdi Sina, i shpallur në kërkim, ai u përplas me tre automjete të tjera në rrugën “Andon Zako Çajupi”, pranë selisë së Partisë së Lirisë, dhe më pas u ndalua nga policia.
Në kontrollin e kryer gjatë operacionit u sekuestrua një armë zjarri, ndërsa drejtuesi i mjetit u shoqërua fillimisht dhe më pas u arrestua në komisariat.
Skerdi Sina është një emër i njohur për policinë, pasi prej janarit të këtij viti është në kërkim për një ngjarje të rëndë që kishte ndodhur në zonën e “Astirit”.
Më 9 janar, një vajzë telefonoi policinë duke njoftuar se ishte dhunuar nga disa persona. Policia bllokoi zonën për më shumë se një orë, në pritje të një rasti të mundshëm rrëmbimi.
Forcat RENEA u detyruan të zbresin me litar nga katet e sipërme për të hyrë në apartament dhe për të shpëtuar vajzën, ku gjatë ndërhyrjes u gjetën edhe armë dhe drogë.
Hetimet zbuluan përfshirjen e disa të rinjve, përfshirë edhe Skerdi Sinën, i cili është arrestuar sot. Hetimet vijojnë ende për zbardhjen e plotë të ngjarjes.
Gjithashtu, Skerdi Sina, dyshohet se është mik i Aleksandër Sadikaj i njohur si Sanco qe u ekzekutua me shpërthim ekskplozivi në 2022 u arreatua në Tiranë me armë pa leje.
Njoftimi i Policisë:
Nuk iu bindën urdhrit të Policisë, përplasën 3 automjete gjatë tentativës për t’u larguar, braktisën automjetin dhe hodhën në rrugë një armë zjarri, Forcat e Posaçme “Shqiponja”, vë në pranga njërin prej tyre dhe vijon puna për kapjen e shtetasit të dytë, i cili dyshohet se ishte drejtuesi i automjetit.
Rreth orës 16:30, në zonën e “Vasil Shantos”, shërbimet e Forcës së Posaçme “Shqiponja” i bënë shenjë ndalimi një automjeti tip “Audi Q8”, në të cilin ndodheshin dy persona, pasi kishin dyshime të arsyeshme se personat në automjet mund të ishin të armatosur. Drejtuesi nuk iu bind urdhrit të Policisë, vijoi lëvizjen me shpejtësi, përplasi tre automjete dhe më pas, së bashku me pasagjerin, braktisi automjetin në rrugën “Moskat”.
Gjatë largimit, dyshohet se këta shtetas hodhën në tokë një armë zjarri pistoletë, e cila u sekuestrua dhe do të dërgohet për ekzaminime të mëtejshme.
Si rezultat i ndjekjes nga shërbimet e Policisë, u bë e mundur kapja dhe shoqërimi në ambientet e DVP Tiranë i pasagjerit në automjet, shtetasit S. S., 29 vjeç, të cilit, gjatë kontrollit fizik, iu gjetën një krehër dhe municion.
Ndërkohë, është bërë identifikimi i drejtuesit të automjetit dhe vijon puna për lokalizimin dhe kapjen e tij. Grupi hetimor i ngritur për rastin po vijon veprimet për zbardhjen dhe dokumentimin e plotë të kësaj ngjarjeje.
