Sot vijon dita e dytë e rinumërimit të votave në qarkun e Fierit, ku pritet të shqyrtohen 354 kuti votimi nga 587 gjithsej.
Një ditë më parë, gjatë fazës së parë të procesit, u hapën 233 kuti, por deri tani, të dhënat nuk kanë sjellë asnjë ndryshim në ndarjen e mandateve.
Edhe pse janë evidentuar disa parregullsi, të ngjashme me ato të konstatuara më herët në Tiranë, ato nuk kanë ndikuar në rezultatet përfundimtare.
Shpresat e koalicionit “Nisma Shqipëria Bëhet” për të fituar mandatin e nëntë në Fier, në kurriz të PS-së, po zbehen.
Deri tani, jo vetëm që nuk është rikuperuar diferenca prej 519 votash e nevojshme për futjen në Kuvend të kandidatit Azmer Duleviç, por koalicioni ka humbur edhe katër vota krahasuar me rezultatin fillestar, ndërsa Partia Socialiste ka fituar 25 vota shtesë.
Ndërkohë, PD deri tani rezulton se ka përfituar padrejtësisht 71 vota, që i janë korrigjuar gjatë rinumërimit. Lëvizja Bashkë ka humbur 4 vota dhe “Koalicioni Djathtas për Zhvillim” 3 vota. Nga ana tjetër, partia “Mundësia” ka përfituar 3 vota shtesë.
Në nivel kandidatësh, garën më të fortë brenda PS e zhvillojnë Zegjine Çaushi dhe Maldrita Bardho.
Fillimisht diferenca mes tyre ishte 64 vota në favor të Çaushit, por pas rinumërimit, avantazhi i saj është thelluar: Bardho ka humbur 39 vota, ndërsa Çaushi ka fituar edhe 5 të tjera.
Procesi pritet të përfundojë brenda ditës, me pritshmëri të ulëta për ndryshime të mëdha në rezultatet përfundimtare.
