Dy shtetas nga Kosova janë proceduar në gjendje të lirë nga Policia e Durrësit, pasi u kapën në port duke hyrë në Shqipëri me një shumë të konsiderueshme parash të padeklaruara, të fshehura në trupin e tyre.
Sipas njoftimit zyrtar të Policisë së Shtetit, gjatë një kontrolli të ushtruar nga Policia Kufitare në portin e Durrësit, në bazë të analizës së riskut, u ndaluan shtetasit kosovarë E. H., 41 vjeç dhe F. M., 37 vjeç.
Gjatë kontrollit fizik, në trupin e tyre u gjetën të fshehura 22,820 franga zvicerane dhe 555 euro, të cilat po përpiqeshin t’i fusnin në vend pa i deklaruar në pikën kufitare.
Shuma e parave u sekuestrua në cilësinë e provës materiale, ndërsa ndaj të dyshuarve nisi procedimi penal për veprën “Mosdeklarimi në kufi i të hollave dhe i sendeve me vlerë”.
Materialet iu referuan Prokurorisë së Durrësit për hetime të mëtejshme.
