Një situatë alarmante është shfaqur në kompleksin “Mangalem”, në zonën e “Ali Demit” në Tiranë, ku mbeturinat kanë mbuluar rrugët përreth, duke kthyer hapësirat publike në vende të papërshtatshme për jetesë.
Pamjet e dërguara nga qytetarët tregojnë grumbuj mbetjesh të hedhura jashtë koshave, që kanë pushtuar hyrjen e kompleksit dhe zonat përreth.
Sipas banorëve, kjo nuk është një situatë e re, por një problem që përsëritet prej vitesh për shkak të numrit të lartë të banorëve dhe mungesës së infrastrukturës për menaxhimin e mbetjeve.
“Koshat janë gjithmonë plot. Plehrat derdhen në rrugë dhe jetojmë përditë mes erës së rëndë dhe pisllëkut,” shprehet një nga banorët.
Situata është përkeqësuar dukshëm gjatë ditëve të fundit, duke rikthyer kujtimet e kohëve kur menaxhimi i mbetjeve ishte ndër sfidat kryesore të Tiranës.
Problemi nuk qëndron vetëm te ndotja dhe pamja e rënduar vizuale, por edhe te rreziku i drejtpërdrejtë për shëndetin publik.
Banorët raportojnë për shtim të ndjeshëm të pranisë së minjve pranë koshave të tejmbushur, çka rrit rrezikun për përhapjen e infeksioneve dhe sëmundjeve.
Përballë kësaj gjendjeje, banorët i bëjnë thirrje autoriteteve të marrin masa të menjëhershme: të vendosin më shumë kosha dhe të garantojnë pastrim të rregullt, në mënyrë që ndotja të mos përshkallëzohet në një krizë mjedisore dhe shëndetësore.
