Turqia po kalon një emergjencë serioze për shkak të zjarreve pyjore që kanë përfshirë rajonet Izmir, Denizli, Aydın dhe Manisa brenda 24 orëve të fundit.
Në Izmir, një nga zonat më të goditura, flakët janë përhapur me shpejtësi në Menderes dhe Seferihisar, duke kërcënuar edhe zonat e banuara. Për shkak të erërave të fuqishme, që kanë arritur deri në 120 km/h, autoritetet kanë urdhëruar evakuimin e të paktën 10 lagjeve për të garantuar sigurinë e banorëve.
Një rast dramatik u shënua në Omur të Seferihisarit, ku një burrë i moshuar në karrocë u shpëtua në momentet e fundit, teksa shtëpia e tij ishte përfshirë nga flakët. Ai u dërgua në spital dhe ndodhet jashtë rrezikut për jetën.
Ndërkohë, autoritetet kanë nisur hetime për zjarrvënie të qëllimshme.
Prokuroria e Izmirit konfirmoi arrestimin e një personi të dyshuar për përdorim të benzinës për ndezjen e flakëve, si dhe ndalimin e 17 të tjerëve që dyshohet se kanë lidhje me ngjarjet e dy ditëve të fundit.
