Ushtria izraelite ka hapur një hetim të brendshëm lidhur me dyshimet për krime lufte në Gaza, pas rritjes së provave se ushtarët mund të kenë qëlluar me dashje ndaj civilëve palestinezë që prisnin ndihma humanitare.
Sipas raportimeve të shumta, qindra civilë janë vrarë gjatë javëve të fundit në sulme ajrore apo me armë zjarri nga Forcat Mbrojtëse të Izraelit , teksa qëndronin në radhë për të marrë ushqime ose i afroheshin qendrave të shpërndarjes.
Gazeta izraelite Haaretz, duke cituar burime ushtarake të paidentifikuara, shkroi të premten se disa ushtarë janë urdhëruar të qëllojnë mbi turmat afër pikave të ndihmës për t’i mbajtur larg pozicioneve të ushtrisë.
Disa prej tyre shprehën shqetësimin për përdorimin e panevojshëm të forcës vdekjeprurëse ndaj njerëzve që nuk përbënin kërcënim real.
Sipas të njëjtit raport, një njësi e specializuar e IDF-së është ngarkuar për të shqyrtuar incidentet që mund të përbëjnë shkelje të ligjit ndërkombëtar, përfshirë sjelljen e trupave izraelite në vendndodhjet e shpërndarjes së ndihmave gjatë muajit të fundit.
Megjithatë, në një reagim zyrtar, IDF mohoi çdo akuzë për urdhra që synojnë civilët: “Asnjë ushtar nuk është udhëzuar të qëllojë qëllimisht mbi civilë, përfshirë ata që i afroheshin qendrave të shpërndarjes së ndihmës,” thuhet në deklaratë. “Udhëzimet tona ndalojnë qartë çdo sulm të drejtpërdrejtë ndaj civilëve.”
Kryeministri Benjamin Netanyahu dhe ministri i Mbrojtjes, Israel Katz, reaguan me tone të ashpra, duke akuzuar Haaretz-in për përhapje të “gënjeshtrave dashakeqe” me qëllim diskreditimin e IDF-së, të cilën e përshkruan si “ushtria më morale në botë.”
Ndërkohë, situata humanitare në Gaza vazhdon të përkeqësohet. Pas bllokadës së rreptë që Izraeli vendosi në mars dhe prill, mungesa e ushqimeve dhe ndihmave ka lënë mbi 2.3 milionë banorë në rrezik urie.
Edhe pas lehtësimit të pjesshëm të kufizimeve muajin e kaluar, shpërndarja e ndihmës është penguar nga rrugë të shkatërruara, ndërhyrje ushtarake, sulme të vazhdueshme dhe një gjendje kaosi në rritje.
Të enjten, 18 persona u vranë në një sulm izraelit ndaj një force sigurie palestineze në qytetin Deir al-Balah, e cila po shpërndante miell në një treg. Viktimat përfshinin gra dhe fëmijë që po përpiqeshin të merrnin ndihma nga një depo pranë kryqëzimit Baraka.
Forca e goditur, e quajtur “Sahm”, ishte ngritur nga autoritetet e Hamasit për të parandaluar plaçkitjet dhe tregtinë e ndihmave humanitare në tregun e zi.
Një ndihmës mjekësor nga kampi i al-Maghazit, Razeq Abu Mandil, përshkroi situatën si të tmerrshme: “Kur mbërritëm, njerëzit ishin të copëtuar, të plagosur rëndë dhe të vdekur… e përsërita rrugën spital-ambulancë disa herë. Spitali ishte në gjendje katastrofike.”
